كلام مجانين
[1]
بنادي ياللي ماشي هناك
وبتكلم
.........
هاتسمعني ؟؟
ماتسمعني
هاقولك جملتين وامشي
بلاش .... جملة
خلاص ... كلمة
ولا كلمة ؟؟!!!
خلاص امشي
........
أنا هابقى ونس روحي
وهاسمعني
[2]
بكلمنى
..........
ولما عيونه تلمحنى
تفتشنى تقلّبني
تكتفني وتدبحني
وتتريق على المجنون
...............
أنا مجنون
بلاغي ف الطريق نفسي
باكلمها تكلمني
ياعالم مرة من نفسي
ألاقي حد يفهمني
[3]
وأنا ماشي على إيدي
لمحت الضحك ف عيونهم
ضحكت كإنه يوم عيدي
ولكن ... ضحكي مش منهم
أنا مبسوط
...........
أنا فرحان
وبضحك ضحكة المخبول
لأول مرة من أزمان
.......................
باشوف الدنيا بالمعدول!!
[4]
مشيت وسط الطريق حافي
مبهدل بس مش مسطول
لبست قميصي بالمقلوب
وعشت حياتي بالمعدول
م أنا مجنون
أنا
....
م
ج
ن
و
ن
...
أحمد ع. الحضري
أبريل 2004
بجد كلماتك بيبقى ليها وقع غريب
ردحذفمش عارفه انى اوصفه
اسلوبك رائع
وفقك الله
والى الامام دائما
شكرا ليك
:)
خلاص امشي
ردحذف........
أنا هابقى ونس روحي
وهاسمعني
قلتلك قبل كده اني مغرم بشعرك ؟؟
طيب .. أديني باقول
ازيك يا شاعرنا يا كبير
ردحذفكل لما افتح ديوانك لازم اقرا القصيده دي على الاقل مرتين
انا ما قلتش ده لحد قبل كده بس بجد بتفكرني بنفسي
شكر جدا يا احمد-من غير استاذ- رضوى داود
انا حبيت بس انى اقولك انى ضفت اللينك بتاعك عندى دا بعد اذنك كبعا ولو مش هيضايقك
ردحذفشكرا ليك
ويا رب للامام دايما
ميرسى
:)
الأخت ساعة الغروب ... سعيد جدًا بتعليقك وبرأيك ... أشكرك بشدة ...
ردحذف**
وليد ... أشكرك :)
**
رضوى
أسعدتني حقا ... تحياتي لك
يا خبر
ردحذفأنا بقالى كتير مستنية انك تنزل القصيدة دى بالذات
وماكنتش عايزة اطلب منك عشان ما ابقاش سخيفة يعنى
بس أنا بجد بحبها أوى
ومن ساعت ما قريتها
وأنا لابسة قميصى بالمقلوب وعايشة حياتى بالمعدول!!
:)
شكراً ع الكلام الحلو اللى بتكتبه لنا ده
وربنا يوفقك
YOTTA
ردحذفسعيد بتعليقك ...
وبعدين لو كنتي طلبيتها كنت نزلتها قبل كدا ..
أشكرك جدًا
أحد أجمل القصائد وأقلها في التعليقات..!
ردحذفليه..؟ مش عارف
جايز الجنون أنصاره قليل زي الحق..؟
أو جايز اللي عايشين بالمقلوب وماشيين بالمعدول كتروا قوي..؟
مش عارف
ولا لاقي حاجة أقولها غير
دام لنا قلمك..
أخي أحمد فيصل ... أشكرك على المرور وعلى الكلمات الجميلة..
ردحذفأحمد.. !!
ردحذفمجنون! يا بختك!
وسا بختي اني عديت كمان
آه.. نسيت.. المقطع التالت يموّت! حلو جداً :)
أهو نجرب يمكن تتعدل!
مودتي
رانيا ...أشكرك على المرور .. سعدت بتعليقك
ردحذفتحياتي :)
الله الله الله بجد
ردحذففنان حقيقي والله
تسلم إيدك
من أجمل الحاجات اللي قريتها الفترة اللي فاتت
:)
أشكر القدر اللي خللاني مريت من هنا عشان استمتع بجنانك العاقل جداً
خالص تحياتي وعميق احترامي وتقديري
P A S H A
ردحذفبجد أسعدني مرورك وكلامك ... تسلم ويا ريت تنور المدونة بآراءك على طول :) شكراا لك
شكرا الله عليك يا استاد
ردحذفودا موقعي للزياره
http://www.mojrim.net/vb
شكرا الله عليك يا استاد
ردحذفودا موقعي للزياره
http://www.mojrim.net/vb