كإنّ الحلم بيخبط على بابك

كإن الحلم بيخبط على بابك
مخالف كل أعراف الحياة
مخالف للقيود اللابدة جوا الآه
وعارف إن كل الحسن قدامك
فخايف ليه تمد اليد تتلقاه؟!

   

****
كإن الحلم محبوبك بتتمناه
قمر واقف على الشباك بتترجاه
تفضفضله وتشكيله من القسوة
فيسمعلك ويتمايل بحنية
فتنسى الهم .. تتمايل من النشوة
فخايف ليه تمد اليد تتلقاه
 
****
كإن الخية منصوبة ف أفكارك
بترفض حلم متعلق ف وجدانك
كإنك طفل بيتهته حروف الحلم
يجييك الحلم...عصفورة بتصطادك !!
وبرضه تلطخ الأحلام بطين العلم
  
****
صبحت سجين لأفكارك ؟؟!!
صبحت سجين لهذا الوعي بيهدك
وللأفكار بتتلائم عليك وتحل في جسمك
برغم الحلم بيلالي
كأنوار الفرح واقفة
وبتودع بواقي الهم
 
****
فلو هاتحل وجدانك من الأحلام
فلازم تشتري دماغين على دماغك
وتستحمل صداع الفكر
ولو هاتحل وجدانك من الأحلام
ليه بتلملم حروف الكلمة من إعلان
بيتعلق ف عرض الحلم
 
****
حروف الكلمة مدهونة بسمن الحلم
فيا تلحق وتاكلها
ياييجي الصبح تفقدها ف حر الوعي
وتنساها
  
***
ولسة الحلم بيخبط على بابك
مخالف كل أعراف الحياة
مخالف للقيود اللابده جوا الآه
وشايفه عنيك زهور الحلم قدامك
فخايف ليه تمد اليد تتلقاه؟!
...

أحمد ع. الحضري
أكتوبر 2002

تعليقات

  1. :)
    الله

    ربنا يكرمك

    فيها كثير حقيقي يتقال
    كلها جميلة وطيبة
    بس هقول ايه ....


    قمر واقف على الشباك بتترجاه
    تفضفضله وتشكيله من القسوة
    فيسمعلك ويتمايل بحنية
    فتنسى الهم .. تتمايل من النشوة
    الله



    كإنك طفل بيتهته حروف الحلم
    يجييك الحلم...عصفورة بتصطادك !!

    وبرضه تلطخ الأحلام بطين العلم

    وصحيح

    فلو هاتحل وجدانك من الأحلام
    فلازم تشتري دماغين على دماغك
    وتستحمل صداع الفكر
    ولو هاتحل وجدانك من الأحلام
    ليه بتلملم حروف الكلمة من إعلان
    بيتعلق ف عرض الحلم

    ربنا يكرمك يا احمد
    :)

    تحياتى الممتنة

    ردحذف
  2. لو قلتلك القصيدة حلوة بس خفيفة
    هتزعل؟

    لأ طبعا مش هتزعل
    كونها قصيدة كويسة .. دا شىء لصالحك
    كونها خفيفة .. جايز علشان الحالة كده
    مش محتملة أكتر يعنى

    جايز
    ــــــــــــــــــــــ

    على فكرة

    يابختك بالأحلام

    ردحذف
  3. فريدة : أشكرك :)
    عين ضيقة: أكيد مش هازعل .. أشكرك على التعليق .. وسعيد بمرورك :)

    ردحذف
  4. لباولو كوهلو فى ساحر الصحراء
    جمله جميله
    اتبع حلمك وامضى
    حين قرأت الروايه أثرت فيا جدا
    اانسان بدون الحلم يفقد انسانيته
    الانسان حيوان حالم
    ولاتعارض بين العلم والحلم
    هناك جدل ين الحلم والواقع
    لكن اذا لم يكن العالم حالم لن يبدع
    انا أول مره أكتشف المدونه الجميله دى
    ومش هتكون آخر مره
    تحياتى

    ردحذف
  5. أبو أحمد : سعدت بتعليقك جدا .. لكن أجمل ما في مرورك هو تعرفي على مدونتك المميزة .. تحياتي

    ردحذف
  6. تاااااني
    تاني الحلم وكأن الحلم
    مازلت أري جمال القصيدة في روعة تصوير خوفك من الحلم الموشك علي التحقق..رهبتك ازاءه وعدم تصديقك لامكانية التحقق أخيرا..مازلت أري السر كامنا في"فخايف ليه، تمد اليد تتلقاه!!"
    مازلت رائعا، منتزعا من صدري"اللااااه" راضية منتشية

    ردحذف
  7. أول مرة أقرأ حاجة توصف الخوف من الحلم ومن عدمه بالطريقة الرائعة دي

    أحمد.. كل التحية لقلمك ولاحساسك
    لكن لسة عندي أمل أقرأ حاجة متزينة ب2008 :)

    ردحذف
  8. بحلم: شكرا مرة أخرى :)

    ملكة : حقا سعيد بمرورك :) تحياتي لك

    ردحذف
  9. عَبرَ سَمَاءٍ تَتَّسِعُ لاخْتِلافِنَا
    يُمْكِنُنَا إعَادةَ خَلْقِ المَسَافَة
    بَيْنَ رِسَالَةٍ وَأُخرَى
    بَينَ السَّطحِ وَالشُّرفَة
    بَينَ الحَقِيقَةِ وَالوَهْم
    ....احة أحيك على القصيدة , بجد رائعة
    انا بحب جدا الشعر العامي
    ومن هنا ورايح لازم ان شاء الله أتابع أشعارك
    لأنها فعلا رائعة

    ردحذف
  10. ذكريات البحر : مرورك ثري وناعم شكرا لك :) وسعيد أن أعجبك ما كتبت هنا

    ردحذف

إرسال تعليق

أفيدوني بانتقاداتكم وإطراءاتكم، أسعد بجميع الآراء

الأكثر زيارة هذا الأسبوع

قصائد من الشعر الأفريقي المعاصر

مقتطفات عن أينشتاين

ألبرت أينشتاين وميليفا ماريتش: قصة حب (اقتباس)

Mr. Nobody

النسبية الثقافية ؟