كلام مجانين


[1]

بنادي ياللي ماشي هناك
وبتكلم
.........
هاتسمعني ؟؟
ماتسمعني
هاقولك جملتين وامشي
   
بلاش .... جملة
خلاص ... كلمة
ولا كلمة ؟؟!!!
خلاص امشي
........
أنا هابقى ونس روحي
وهاسمعني

[2]

بكلمنى
..........
ولما عيونه تلمحنى
تفتشنى تقلّبني
تكتفني وتدبحني
وتتريق على المجنون

...............

أنا مجنون

بلاغي ف الطريق نفسي
باكلمها تكلمني

ياعالم مرة من نفسي
ألاقي حد يفهمني

[3]

وأنا ماشي على إيدي
لمحت الضحك ف عيونهم

ضحكت كإنه يوم عيدي
ولكن ... ضحكي مش منهم

أنا مبسوط
...........
أنا فرحان

وبضحك ضحكة المخبول
لأول مرة من أزمان
.......................
باشوف الدنيا بالمعدول!!

[4]

مشيت وسط الطريق حافي
مبهدل بس مش مسطول
لبست قميصي بالمقلوب
وعشت حياتي بالمعدول

م أنا مجنون
أنا
....

م

ج

ن

و

ن 


...


أحمد ع. الحضري

أبريل 2004

تعليقات

  1. بجد كلماتك بيبقى ليها وقع غريب
    مش عارفه انى اوصفه

    اسلوبك رائع

    وفقك الله
    والى الامام دائما

    شكرا ليك

    :)

    ردحذف
  2. خلاص امشي
    ........
    أنا هابقى ونس روحي
    وهاسمعني

    قلتلك قبل كده اني مغرم بشعرك ؟؟
    طيب .. أديني باقول

    ردحذف
  3. ازيك يا شاعرنا يا كبير
    كل لما افتح ديوانك لازم اقرا القصيده دي على الاقل مرتين
    انا ما قلتش ده لحد قبل كده بس بجد بتفكرني بنفسي
    شكر جدا يا احمد-من غير استاذ- رضوى داود

    ردحذف
  4. انا حبيت بس انى اقولك انى ضفت اللينك بتاعك عندى دا بعد اذنك كبعا ولو مش هيضايقك

    شكرا ليك
    ويا رب للامام دايما
    ميرسى

    :)

    ردحذف
  5. الأخت ساعة الغروب ... سعيد جدًا بتعليقك وبرأيك ... أشكرك بشدة ...

    **
    وليد ... أشكرك :)

    **
    رضوى
    أسعدتني حقا ... تحياتي لك

    ردحذف
  6. يا خبر
    أنا بقالى كتير مستنية انك تنزل القصيدة دى بالذات
    وماكنتش عايزة اطلب منك عشان ما ابقاش سخيفة يعنى

    بس أنا بجد بحبها أوى
    ومن ساعت ما قريتها
    وأنا لابسة قميصى بالمقلوب وعايشة حياتى بالمعدول!!
    :)
    شكراً ع الكلام الحلو اللى بتكتبه لنا ده
    وربنا يوفقك

    ردحذف
  7. YOTTA
    سعيد بتعليقك ...
    وبعدين لو كنتي طلبيتها كنت نزلتها قبل كدا ..
    أشكرك جدًا

    ردحذف
  8. أحد أجمل القصائد وأقلها في التعليقات..!
    ليه..؟ مش عارف
    جايز الجنون أنصاره قليل زي الحق..؟
    أو جايز اللي عايشين بالمقلوب وماشيين بالمعدول كتروا قوي..؟
    مش عارف
    ولا لاقي حاجة أقولها غير
    دام لنا قلمك..

    ردحذف
  9. أخي أحمد فيصل ... أشكرك على المرور وعلى الكلمات الجميلة..

    ردحذف
  10. أحمد.. !!
    مجنون! يا بختك!

    وسا بختي اني عديت كمان
    آه.. نسيت.. المقطع التالت يموّت! حلو جداً :)

    أهو نجرب يمكن تتعدل!

    مودتي

    ردحذف
  11. رانيا ...أشكرك على المرور .. سعدت بتعليقك

    تحياتي :)

    ردحذف
  12. الله الله الله بجد
    فنان حقيقي والله
    تسلم إيدك
    من أجمل الحاجات اللي قريتها الفترة اللي فاتت
    :)
    أشكر القدر اللي خللاني مريت من هنا عشان استمتع بجنانك العاقل جداً

    خالص تحياتي وعميق احترامي وتقديري

    ردحذف
  13. P A S H A

    بجد أسعدني مرورك وكلامك ... تسلم ويا ريت تنور المدونة بآراءك على طول :) شكراا لك

    ردحذف
  14. شكرا الله عليك يا استاد ودا موقعي للزياره http://www.mojrim.net/vbالاثنين, 30 مايو, 2011

    شكرا الله عليك يا استاد
    ودا موقعي للزياره
    http://www.mojrim.net/vb

    ردحذف
  15. شكرا الله عليك يا استاد
    ودا موقعي للزياره
    http://www.mojrim.net/vb

    ردحذف

إرسال تعليق

أفيدوني بانتقاداتكم وإطراءاتكم، أسعد بجميع الآراء

الأكثر زيارة هذا الأسبوع

قصائد من الشعر الأفريقي المعاصر

مقتطفات عن أينشتاين

ألبرت أينشتاين وميليفا ماريتش: قصة حب (اقتباس)

Mr. Nobody

النسبية الثقافية ؟