مدد





إلى الشاعر فؤاد حداد...
لوحة لمحمود سعيد


لما التقيت الكلمة مدالي الكفوف
لما التقيت الكلمة قايدالي شموس
قمت ارتقيت فوق السما

ندِّيت فؤادي بالحروف
وف ضيها المغموس
..
بدم الأوردة
قلب الحقيقة اللي بدا
إدى الفؤاد اجمل دروس
**
"يا اهل الأمانة والندى والشوق"
....
غريق
غرقان ف بحر الضي والشوق البرئ
نداكوا قبلي في الضلام شاعر جرئ
نوّر كلامه الليل ووراني الطريق
كان شعره طاير في الهوا زي الحمام
زي العيون السهرانين خلف الإمام
تستنى وقت الفجر وترد الأدان
زي القلوب مشتاقة للبيت الحرام
زي المياه مترقرقة للعطشانين
تروي الجميع ويباتوا ليها مشتاقين
كان شعره ماشي في الهوا غيمة حنين
ييجي الشتا تروي بمطرها المحرومين
كان شيخ طريقة الشعر .. بيصحّي البلد
قابلت ضيه في الطريق ... قلبي اتولد
بيلف شعره في الدروب عمّال يقول
"يا أهل الأمانة والندى والشوق" مدد
..
أحمد الحضري

2003

تعليقات

  1. الحلم اجمل كتير ياأحمد
    معلش ده رأيي ممكن أكون غلطان
    تحياتى ومحبتى لعمنا فؤاد حداد
    وتحياتى ليك

    ردحذف
  2. القصيدة حقيقي جميلة بس أنا مش مع النوع ده من الشعر
    المونة جميلة أنا أول مرة أزورها
    شكلها جميل وألوانها حلوة

    ردحذف
  3. أبو أحمد : أعتز دائما بمن يقولون رأيهم بصراحة ...أنا مدرك طبعا الفرق بين القصيدتين ... حقا أسعدني مرورك .. تحياتي

    ردحذف
  4. ميس فاطمة : أسعدني أن مررتِ بالمدونة .. . أتمنى أن أعرف رأيك في بعض ما بها من كتابات .. تحياتي

    ردحذف
  5. جيت هنا كتيييير بس

    حقيقي قصيدة جميلة من شاعر احساسه عالى لشاعر احساسه عالى

    حقيقي يا أحمد

    قمت ارتقيت فوق السما
    ندِّيت فؤادي بالحروف

    حقيقي انك
    غرقان ف بحر الضي والشوق البرئ

    صورك رائعة يا أحمد حية وبريئة وكانها الحياة الي بنتمناها

    زي العيون السهرانين خلف الإمام
    تستنى وقت الفجر وترد الأدان
    زي القلوب مشتاقة للبيت الحرام
    زي المياه مترقرقة للعطشانين
    تروي الجميع ويباتوا ليها مشتاقين

    الله عليك وعليه

    كان شيخ طريقة الشعر .. بيصحّي البلد
    قابلت ضيه في الطريق ... قلبي اتولد

    تحياتى يا أحمد
    صور القصيدة جميلة قوى وحقيقي بريئة جدا

    تحياتى الممتنة

    ردحذف
  6. لسه فاكر أول مرة لما سمعتها منك يا حضرى .. متهيألى فى ندوة مغاميرية بمكتبة مبارك ، حضرها الشاعر جمال بخيت .. قلت وقتها: الله..

    ردحذف
  7. أزال المؤلف هذا التعليق.

    ردحذف
  8. الشاعر الرقيق / أحمد الحضر
    كل سنة وأنت طيب
    وبألف خير
    قصيدتك جميلة
    تحياتي

    ردحذف
  9. كان نفسي الاقي تدوينة جديدة فى مدونتك النهاردة يا أحمد

    كنت محتاجة ده

    خبر تتعوض ان شاء الله

    تحياتى

    ردحذف
  10. الأخوة الأعزاء .. أشكركم جميعا على المرور وعلى الاهتمام ...أرجو أن تعذروني على التأخر في الرد وفي التحديث ...
    تمنياتي لكم بالتوفيق والسعادة ...

    ردحذف

إرسال تعليق

أفيدوني بانتقاداتكم وإطراءاتكم، أسعد بجميع الآراء

المشاركات الشائعة من هذه المدونة

هل العالم حقيقي، أم أنه مجرد وهم أو هلوسة؟

ما هو الفن الطليعي؟ (Avant Garde)

ألبرت أينشتاين وميليفا ماريتش: قصة حب (اقتباس)

قصائد من الشعر الأفريقي المعاصر