نهايات


[1]
ورقة
........
.......
ملِّت غصن الشجرة الثابت
قامت ترقص ويا الريح


دارت
ويا النسمة دواير
رقصت
زي الطير الطاير
لكن قرب نهاية الرقصة
بصّت بصة
ناحية غصن الشجرة اتنفضت
...........
كانت نسيت لونها الأخضر
فوق الشجرة

[2]
موجة
كبرت حبة
عليت حبة
قلبت وسط جنونها مراكب فيها أحبة
واما اكتشفت إنّ الضعف اتملّك حبة
جت تتخبى
بس انكسرت
........
عند صخور الشط الصلبة

[3]
عصفور دبلان
افتكر الصياد والفخ
وعيار انطخ
وافتكر العمر المالح
و الطير الجارح
واستغرب
ليه بعد ما يفلت وبدون خدش
بيموت دلوقتي ف قلب العش!!

[4]
غيمة وماشية ف درب الريح
لمحت شجر الكون دبلان
رقّت
حنّت
قامت رخّت
روت الأرض لحد ما فاقت
روت الأرض لحد ما ماتت

[5]
بنوتة جميلة
السما بنوتة جميلة
ماكياجها النور والسحر
وف كل نهار
بتبص ف موج البحر
تلمح ف مرايته صورتها
تفضل تتزوق فيها لحد الضهر
تعدل ضي النجمة اللي ف مفرقها
وتداري قلقها
.....
بس اليوم
الدمعة اترسمت فوق ملامحها غيوم
لما اكتشفت
إن النجمة اللي ف مفرقها
مات الضي الساكن فيها
واكتشفت
إن الوقت خلاص اتغير

[6]
سمكة
........
لمحت سنارة ف آخر خيطها الطُعم
الموت متزّوق
جاي بيغازل روح قلقانة
والجوع بيقولوا عليه من أهل الكفر
طب تستنى تموت م الجوع؟؟!!
ولا تموت شبعانة ؟؟!!

أبريل 2004
..
أحمد الحضري
من قصائد ديوان إقفل عليك الحلم

تعليقات

  1. حسيتك ليك لغه ولحدك

    كل جمله فى كتاباتك تستاهل تسمى قصيده

    بجد الجمله الواحده فيها الف الف معنى بعيد وقريب

    شكرا ليك

    امتعتنى لساعات بكلمات قراتها فى لحظات

    فيه كلمات كان وقعاها قاسى اوى
    او بمعنى اصح فوقنى على الحقيقه

    وفيه كلمات اخدتنى فى عالم اخر
    حنون وحالم

    كل دا هنا وعندك فى السطر الواحد

    بجد كل الشكر ليك

    :)

    ردحذف
  2. الأخت ساعة غروب
    أسعدني جداا رأيك
    شكرا على مرورك وعلى تعليقك الجميل
    تحياتي

    ردحذف
  3. ألف مبرووووووووووك علينا المدونة
    شكرا يا حضرى على اللنك الجميل ده
    بحب اوى اشوف نفسى فى حروفك
    ربنا يخلى لنا قلمك
    و منور بلوجرز

    ردحذف
  4. اولا مبروك ايها الشاعر البسيط مدونة نلتقيك فيها

    ثانيا : جميل جدا اني اعلق اول مرة على قصيدة نهايات

    قصيدتي المفضله في ديوانك

    .........

    كتير وقفت قدام سؤالك

    طب تستنى تموت من الجوع

    ولا تموت شبعانة؟؟

    وما وصلتش لاجابة ترضيني

    كل مرة اختار اجابة ..

    وارجع اختار التانية

    واشكرك في كل مرة على طرح الفلسفة العميقة دي

    بالكلمات الجميلة دي

    كمان حابة اشكرك على ذكر اسماء اصحاب اللوحات

    بحب نسبة العمل لصاحبه ..ودا شيء مش غريب عليك

    في انتظار جديدك

    تحياتي

    ردحذف
  5. محمود سراج باشا ...
    البلوجز منور بيكم يا باشا ..شكرا على المرور
    هدى شكرا على التعليق اللي أسعدني بجد
    عمرو غريب شكرا على المرور
    تحياتي لكم ...

    أحمد الحضري

    ردحذف
  6. زرقاء اليمامة: أشكرك على الإطراء ... سعدت حقا برأيك في القصيدة وباهتمامك... لا مشكلة على الإطلاق في نشر القصيدة على المدونة، والشرف لي أنا ... أشكرك على رقيك ... وسعدت بالتواصل معك :)

    ردحذف
  7. مساء الخيرات و السعادة
    أشكرك أخي
    أنا راحة حالا أنشرها
    فوووووووووووووووووو

    ردحذف
  8. معلش سامحني
    أصلي ماصدقت و أخدن الموافقة

    ردحذف

إرسال تعليق

أفيدوني بانتقاداتكم وإطراءاتكم، أسعد بجميع الآراء

المشاركات الشائعة من هذه المدونة

هل العالم حقيقي، أم أنه مجرد وهم أو هلوسة؟

ما هو الفن الطليعي؟ (Avant Garde)

ألبرت أينشتاين وميليفا ماريتش: قصة حب (اقتباس)

قصائد من الشعر الأفريقي المعاصر