الواجب
بقلم: أحمد ع. الحضري
متأخر
مش فاكر على إيه
متوتر مش عارف من إيه
تايه
بمشي رايح جاي
بسأل: إمتى وفين وإزاي.؟
***
ف القلب زكايب
مليانة كلام
ف الأوضة خيال متنطور
زي التلميذ الخايب
باستنى لآخر لحظة
ثم أكتب كل المتأخر
***
في كلام لسة تقيل على القلب
وكلام نُص ناسيه
وكلام علشان اتعودت عليه
محتاج أنساه
ثم أفتكره
جايز لحظتها أعرف أرد عليه.
***
زي التلميذ الخايب
لمحوني
محنى ع المكتب من غير صوت
ما بقوش عارفين: أنا نمت
ولا بحاول
أكتب بعض المتأخر
قبل اليوم ما يموت
22 ديسمبر 2025

تعليقات
إرسال تعليق
أفيدوني بانتقاداتكم وإطراءاتكم، أسعد بجميع الآراء