غرباء مرة أخرى، لأنها حياتي الأولى

الدراما لما بتفكر في موضوع بتكون طريقة معالجتها له مختلفة بطبيعة الحال عن المعالجات النظرية سواء فلسفية أو اجتماعية؛ لإنها بتستخدم أدوات مختلفة. وبالتالي طريقة تفكيرها بتكون مختلفة، مشاهد، ومواقف متخيلة، ومشاعر بتعايشها كمشاهد، ووجهات نظر بتتكشف مع الوقت، وبتتغير. كل دا بيخلي في إمكانية لإضفاء عمق من نوع مختلف. وبتخلي المشاهد لو عايش الحالة بيتفهم حالات وزوايا نظر ممكن ما كانش هيشوفها أو يحسها بنفس الحميمية والسلاسة. جمعت هنا ملاحظتين كنت كتبتهم عن مسلسلين كوريين حسيت إنهم بيفكروا -بطريقة غير مباشرة- في الزواج كمؤسسة بطريقة مثيرة للاهتمام.

strangers again

البطلة اللي كانت دايمًا غاضبة من البطل بعد طلاقهم نتيجة خيانته، اكتشفت في الحلقة الرابعة إن ما كانش فيه خيانة. وإن البطل زيف الدليل اللي بيدينه لإن دي كانت أسهل طريقة يحصل بيها على الطلاق. السبب الحقيقي اللي خلى البطل عايز الانفصال، هو وفقا لكلامه إنه اكتشف إن حياة الجواز مش مناسبة ليه. بس لما بيحكي، ولما هي بتعيد النظر في الأمور بنكتشف إن اللي خلاه حاسس بكدا، مش أي حادث أو موقف كبير، بس التفاصيل العادية المعتادة، المكررة. زي إنه مش لاقي مساحته الخاصة، اضطراره دايما يشوف أفلام مش حاببها، في مشهد كان بيتفرج على فيلم مستقل واضطر يغير لفيلم رعب لما هي انضمت ليه، التكييف متقاد ولا مطفي ...، تفاصيل كتير تافهة بس تكرارها وعدم القدرة على مناقشة التفاصيل دي من غير الخوف من خناقة خلاه مش قادر يستحمل. البطلة بتكتشف إنها فعلا ما كانتش بتتراجع أو بتتنازل في كتير من المواقف، وإنها ما كانتش عارفة تقرا سبب البعد اللي بيحصل بشكل سليم، وكانت متخيلة إنه نتيجة لعدم وجود أطفال. بس فكرة وجود أطفال كانت فكرة بتزود خوفه، ودا خلاه يقرر ينفصل.

because this is my first life

المسلسل دا فيه تيمة مشهورة هي تيمة العلاقة اللي بتنتقل من المزيف للحقيقي، هي تيمة معروفة ومشهورة في الأفلام والروايات. بس المسلسل دا فيه منطقة مختلفة هي إني حسيت إنه طول الوقت بيحاول يفكر في معنى الزواج كمؤسسة وكعلاقة. الزواج اللي بيبتدي مزيف فيه كتير من عوامل النجاح اللي مش موجودة في الزواجات التقليدية اللي بنشوفها في خلفية أحداث المسلسل، الزواج بينهم هو عقد واضح، فيه حدود واضحة، احترام متبادل، احترام للحدود، عدم التدخل في الأمور الشخصية، ادراك واتفاق مسبق على مسؤوليات كل طرف. الأمور اللي بنشوف كتير من المتزوجين العاديين بيكافحوا فيها في خلفيات المشاهد، نتيجة أخذ الأمور باعتيادية ودون تفكير أو مراجعة. المسلسل بيناقش وطأة التقاليد الاجتماعية على الزواج كمؤسسة، بيخليها أصعب ف أوقات كتير. بس ف المقابل التحول اللي بيحاول الأبطال يواجهوه كالعادة بيخليهم يعرفوا عن نفسهم أكتر. المسلسل ذكي، وفيه مثال جيد للطريقة اللي ممكن الدراما فيها تفكر وتناقش موضوعات بطريقة مختلفة عن طرق التفكير الأخرى. المسلسل كمان فيه مشاهد وحوارات كتير فيها شاعرية عالية ودا حبيته.